Қазقاز        
Бізге хат жазыңыз
Бізге хат жазу

Байланыс

Мекенжайы:
Астана қаласы, Сауран көшесі, 7А
Телефон:
+7(717-2) 40-83-67

+7(717-2) 40-83-93
E-mail:
info@tilqazyna.kz

tilalemi.kz@gmail.com
Кіру 
Кіру тіркелу

Тәуелсіздік тұғыры - мемлекеттік тіл

Өз тілін өзі білмеген ел – ел болмайды

Халел Досмұхамедұлы

Сөзі жоғалған ұлттың өзі де жоғалады

Ахмет Байтұрсынұлы

Тіл – адам жанының тілмашы

Мағжан Жұмабаев

Тіл тазалығы үшін күрес - ешқашан толастамайтын мәңгілік күрес

Бауыржан Момышұлы

Ана тілін жақсы меңгере алмай тұрып, өзге пәндерді түсіну мүмкін емес

Жүсіпбек Аймауытұлы

«Қазақ тілі» (А1-А2 деңгейлері) әмбебап оқулығының таныстырылымы өтті

21.2.2022 595
Қазақстан Республикасы Білім және ғылым министрлігі Тіл саясаты комитетінің тапсырмасымен Шайсұлтан Шаяхметов атындағы «Тіл-Қазына» ұлттық ғылыми-практикалық орталығы қазақ-ағылшын, қазақ-түрік, қазақ-орыс тілінде шетелдегі қазақ диаспорасына арналған әмбебап оқулық әзірледі. Оқулық көпшілікке таныстырылмас бұрын Түркияның Хаджеттепе университетінде апробациядан өткізілді. Бүгінгі тұсаукесер барысында оқулықтың артықшылықтары мен кемшіліктері айтылып, алдағы уақытта түзетілуі тиіс тапсырмалар мен әдістерге мән берілді.

Салтанатты шараны «Тіл-Қазына» ҰҒПО «Әдістеме» басқармасының басшысы Ж.Ысқақова шетелдегі қазақтарға арналған әмбебап оқулық әзірлеудегі басты мақсат пен міндеттен бастады.

- Біздің басты мақсатымыз - отандық және шетелдік қазақ тілін оқыту орталықтарына ғылыми-әдістемелік қолдау көрсету. Осы мақсатқа сәйкес заман талабына сай, жаңа әдіс-тәсілдер мен технологияларды еркін қолдануға мүмкіндік беретін оқулық әзірлеу міндеті туындады. Сондықтан барлық қазақ тілін үйренуші азаматтарға қолжетімді әрі өзінің еркін сөйлеу тілі арқылы үйренуге ыңғайлы оқулық әзірленді,- дейді Ж.Ысқақова. Оқулықты әзірлеуде үйлестірушісі қызметін атқарып, басынан аяғына дейін қадағалап, тексеріп, жетекшілік еткен Орталықтың ғылыми қызметкері Орманова Айгүл Әділбекқызына алғыс білдірді.

Шарада А1 деңгейінің авторы А.Балабеков (Назарбаев университеті Қазақ және түркология департаментінің оқытушысы) пен А2 деңгейінің авторы Н.Дәулеткереева (ф.ғ.к.) таныстырылым жасап, кітап құрылымы мен тапсырмаларға толық тоқталып өтті.

Шетелдегі диаспора өкілдері үшін арнайы әзірленген оқулыққа «Көк Ту» қазақ мәдениеті қоғамы қазақ тілі курсының үйлестірушісі, Хаджеттепе университетінің оқытушысы Салтанат Ұзақбайқызы мен Омбы қазақтары ұйымы төрағасының орынбасары, заң ғылымдарының кандидаты Торғын Ашенова, Алматыдағы АҚШ Бас Консулдығында және АҚШ USID агенттігіндегі дипломаттарға қазақ тілін үйретуші, PhD Д.Койшығұлова пікір білдірді. Тәуелсіз сарапшылар шетелдегі қазақтарды ана тілінде оқыту үшін әмбебап кітаптардың қажеттігін айта келе, мазмұнына толықтырулар мен түзетулер енгізуге ұсыныс білдіріп, алдағы уақытта бірлесе жұмыс жасауға ынталы екендіктерін жеткізді.

- Әрбір адам өзі тіршілік ететін ортаның менталитетін бойына сіңіреді. Сондай-ақ күнделікті қолданыста болатын сөздердің де айырмасы бар. Сондықтан оқулық қай тілде жазылса, сол халықтың немесе сонда тұратын азаматтардың тұрмыс-тірлігіне сай жазылғаны тіл үйрену, үйрету процесін жеңілдетеді әрі жылдамдатады,- дейді Т.Ашенова.

Ал қазақ тілін қызығушылықпен үйренген Гарвард университетінің PhD докторанты Алекс Уорбуртон: «Қазақ тілін оқытатын ағылшын тіліндегі оқулықтың шығарылуы мені қатты қуантты. Себебі өзің еркін түсінетін тілде, тікелей тіл үйрену әлдеқайда жеңіл. Сондықтан бұл бастама мені қуантты. Алайда оқулықта кейбір сөздердің аудармасында, жазылуында (таңбалануында – ред.) қателер бар. Аз-кем осындай кемшіліктер түзетілсе, жақсы болар еді»,- деді.

Онлайн шараға оқулық авторлары, өңірлік орталықтардың әдіскерлері, қазақ тілі оқытушылары мен тіл үйренушілері, тіл жанашырлары қатысты.

Айта кетейік, «Қазақ тілі» (А1-А2 деңгейлері) әмбебап оқулығы tilalemi.kz сайтына орналастырылған. Танысып, қолданамын деушілерге қолжетімді. Ал оқулықтың В1, В2 деңгейлері ағымдағы жылы шығарылады деп жоспарланған.

Тегтер:
Авторы: "Тіл әлемі" ақпарат

Сондай-ақ, оқи отырыңыз

212

ақпарат

В.ФОН ГУМБОЛЬДТТІҢ ЛИНГВОФИЛОСОФИЯЛЫҚ ҚАҒИДАЛАРЫНЫҢ А.БАЙТҰРСЫНҰЛЫ ТІЛДІК МҰРАСЫНЫҢ ЛИНГВОМӘДЕНИ ИДЕЯСЫМЕН ҮНДЕСТІГІ

154

ақпарат

ЛИНГВИСТИКАЛЫҚ САРАПТАМАШЫЛАР БАС ҚОСТЫ

168

ақпарат

ДӘРІС БЕРУ ЖАЛҒАСУДА