АБАЙ ИНСТИТУТЫ: ӨЗГЕРІСТЕР МЕН ӨРЕЛІ ІСТЕР
Бұл туралы Қазақстан Республикасы Тіл саясаты комитеті Ш.Шаяхметов атындағы «Тіл-Қазына» ұлттық ғылыми практикалық орталығының Бас директоры Мақпал Жұмабай өзінің әлеуметтік желідегі парақшасында былай деп жазды:«Достар, бізде мынадай әдемі жаңалық! Орталық құрамындағы «Абай институтының» әлеуетін арттыруға күш салып жатырмыз. Өз алдына мақсаттарын айқындап, іргелі жұмыстар бастадық. Болашақта Гете, Юнус Эмре институттары деңгейіне көтерсек дейміз».
Шетелдегі қазақ диаспорасына қазақ тілін үйрету – институттың негізгі міндеттерінің бірі. Институттың тіл үйрету бағыты осыдан үш жыл бұрын бастау алған болатын. Бастапқыда бес офлайн сынып ашылған болса, бүгінде оның саны екі есеге өсті.
Ресейдің Омбы, Польшаның Варшава қалаларында биылғы маусым айынан, Моңғолияның Ұланбатыр, Иран Республикасының Горган қаласында шілдеден, Түркияның Анталия қаласында тамыздан бері оқыту жүріп жатса, Түркияның Ыстамбұл, Францияның Париж, Аустрияның Вена, Мажарстанның Будапешт қалалары мен АҚШ-тың Калифорния штатында қыркүйек айынан бастап оқыту толыққанды жүруде.
Сабақтар «Тіл-Қазына» орталығы жарыққа шығарған шетелдегі қазақ диаспорасына арналған әмбебап оқулықтармен өткізіліп жатыр.
Оқытушылар жыл сайын арнайы біліктілік курстарына қатысып, өздерінің тіл оқыту әдістемелерін жетілдіріп отырады. Сонымен қатар, біз шетелдегі оқытушыларымызбен бірлесе қазақ тілі оқулықтарын жазу тәжірибесін тұңғыш рет қолға алдық. Биыл соның алғашқы нәтижесі – «Түрік азаматтарына арналған қазақ тілі оқулығының» А1 деңгейін ұсынбақпыз. Келесі жылы да бұл тәжірибе жалғасып, шетелдік азаматтар үшін бірнеше оқулық жарық көрмек.
