Қоғамда мемлекеттік тілдің мәртебесін көтеру, қазақша сөйлесу мәдениетін арттыру, мемлекеттік тілді үйренуге қызықтыру әрі тілді меңгерген адамдарды қолдау мақсатында еліміздің түкпір-түкпірінде Қазақстан халқы Ассамблеясының бастамасымен «Мен қазақша сөйлеймін» атты жалпы республикалық акциясы өтті.

Аталған акцияның аясында Арқалық қаласы әкімдігінің қалалық тілдерді оқыту орталығы да этнос жастары арасында «Қазақшаға қалайсыз?» атты сайыс өткізіп, оған Ы.Алтынсарин атындағы АрқМПИ, Арқалық политехникалық, Торғай аграрлық-техникалық, Арқалық экономикалық, Н.Құлжанова атындағы Торғай гуманитарлық колледждерінен 15 білім алушы қатысты.

Шара барысында сайысқа қатысушылар «Жалғасын тап», «Бір әріпке – 10 сұрақ», «Суреттер сөйлейді», «Әуенді тап», т.с.с. 7 кезең бойынша бақтарын сынап, мемлекеттік тілді қаншалықты меңгергендерін көрсетті.

Сайыс соңында барлық қатысушылар орталық басшысының алғысхаттарымен марапатталып, естелік сыйлықтарға ие болды.

Қазіргі таңда 140-тан астам ұлт бір шаңырақ астында бақытты, бейбіт ғұмыр кешіп келеді. Қазақтың дархан даласын мекендеген кез келген ұлт өкілі өз ана тілімен қатар, туған елінің мемлекеттік тілін қадірлеп, құрметтеуі тиіс.

«Көп тіл білсең, көкжиегің кең болар,

Құрметтейді кісі екен деп төрге озар», - демекші бір емес бірнеше тіл үйренгеннің жолы әрдайым ашық болары сөзсіз. Ендеше, мемлекеттік тілдің де мәртебесін көтеруге баршамыз атсалысайық!

Тілдерді оқыту орталығының әдіскері

Ж.Муханбетжанова