Қарашаның 14-ші жұлдызында арқалықтықтар латын графикасындағы әліпбиге негізделген жалпыхалықтық диктантқа қатысты. Аталмыш шара еліміздің түкпір-түкпірінде бір уақытта қала әкімшілігі тарапынан дайындалған арнайы аудиторияларда, белгіленген мекемелерде жүргізілді.

Жалпыреспубликалық акция жаңа қазақ әліпбиін насихаттауға, латын негізді қазақ әліпбиін практикалық тұрғыдан меңгеруге дағдыландыруға бағытталған.

Бұл туралы алдын ала жергілікті телеарнадан 2 тілде анонстық хабарлама беріліп, әрбір мекемеде арнайы құрылған жұмыс тобы түсіндіру жұмыстарын жүргізген болатын. Жалпыхалықтық диктантқа қаламыздан 3 мыңнан астам адам қатысты. Еmle.kz, tilalemi.kz сайттарында, «Шалқар» және «Қазақ радиосы» арналарының тікелей эфирінде қарапайым халыққа қолжетімді екенінен хабардар болған тұрғындар аталған шараға ерікті түрде көпшілікпен бірге отырып және онлайн қашықтықтан қатысуға ниеттерін білдіріп, ат салысты.

Диктанттың тақырыбы — «Рухани жаңғыру» бағдарламасы. Мәтін 80-ге жуық сөзден тұрды. Диктант аяқталған соң, мәтінді арнайы құрылған топ тексеруден өткізіп, облыстық Тілдерді дамыту басқармасына жіберілді.

Жалпыреспубликалық диктант жазуға қатысқандардың көбі жаңа қазақ әліпбиін қолдану барысында кейбір қиындық туғызатын мәселелердің барын да айтып жатты. Кемшін тұстарының бірі – төл әріптерімізде. Шара барысында Әлі де жетілдіре түсуді қажет ететін, әсіресе, «і» мен «и», «ы» мен «й», «у» мен «ұ», «ү» әріптері тек мектеп оқушыларын ғана емес, латын қаріптерін меңгергендерді де шатастырады деген пікірлер қалыптасуда.