Қазقاز        
Кіру 
Кіру тіркелу

Тәуелсіздік тұғыры - мемлекеттік тіл

Өз тілін өзі білмеген ел – ел болмайды

Халел Досмұхамедұлы

Сөзі жоғалған ұлттың өзі де жоғалады

Ахмет Байтұрсынұлы

Тіл – адам жанының тілмашы

Мағжан Жұмабаев

Тіл тазалығы үшін күрес - ешқашан толастамайтын мәңгілік күрес

Бауыржан Момышұлы

Ана тілін жақсы меңгере алмай тұрып, өзге пәндерді түсіну мүмкін емес

Жүсіпбек Аймауытұлы

​Тіл білместік қасіреті хақында...

2.4.2019 100

Қазақта уызына жарымаған деген сөз бар. Уыз жаңа төлдеген малдың желін, жаңа босанған әйелдің алғашқы емшек сүті. Қазақ жаңа туған төлді де, жаңа туған сәбиді де алғашқы сол уыз сүтке жарытып, әбден тойдырып емізуге ден қойған. Өйткені, уызына жарымай өскен төл де, уызына жарымаған бала да өсе келе аурушаң болады екен.

Бүгінгінің қазақтарының басым көпшілігінің өз ана тілінде сөйлей алмай жатқаны да, сол құдіретті де, қасиетті қазақ тілінің уызына туғанынан жарымай өскендіктерінен болып отыр ма деп ойлаймын. Жарық дүниеге енді келіп, тілі енді шығып келе жатқан жас сәби өзінің туған анасы сөйлемейтін өз ана тілінің уызына қалай жарысын?!

Анасы ана тілінде сөйлемеген баланың өзі де ана тілінде сөйлей алмайды. Туған әкесі туғанынан өз баласымен таза қазақша сөйлемесе, ол бала өз ана тілін кімнен үйренеді?! Әжесі мен атасының тілі де айнып бара жатыр. Өйткені, бүгінгінің қариялары да өз немерелерімен қатарласа жарысып, олар да өз ұрпақтарымен өзге тілде шүлдірлесіп жүр. Өзінің туған шаңырағында ана тілін естімеген және де төрдегі көгілдір экран мен қолындағы байланыс құралдары күні-түні өзге тілде «сайрап» тұрса, тілі енді шығып келе жатқан қазақтың баласы қазақтың тілін енді қалай, кімнен және қайтып, қайда барып үйренеді?!

Қазақ қоғамы қазақ тілі үшін әлі де алаңдаулы болса, ендігі арада оған мемлекет те, одан қалды Қазақстанды мекендеп отырған өзге диаспоралардың өкілдері де кінәлі емес. Әр қазақ өзіміз кінәліміз! Қазақ тілі мемлекеттік тіл болып саналғанымен және де Елбасы Біріккен ұлттар ұйымының мәртебелі мінбесінен қазақ тілінде сөйлесе де, сол мемлекеттік тілімізді өз еліміздің мемлекеттік мінбелеріне, өз төрімізге шығара алмай келеміз.

Осы күні анасының тілін өзінің өгей балалары өзектен теуіп жатқан тілді өзге біреу маңдайынан сыйпап, өзге біреулер жарылқайды дегеніңіз бос әурешілік. Кейде әлдебір ұлт өкілінің біреуі қазақ тілін үйреніп, сөйлей бастаса болды, соны бүкіл қазақ болып жар сала жарнамалап, соған мәз-майрам болып, қазақтың тілінің көсегесі енді көгеріп шыға келетіндей масайраймыз.

Ал, өз елімізде, өз мемлекетімізде өз тілінде сөйлей алмай жатқан, тіпті сөйлейін-ау деген ой қаперіне де кіріп шықпайтын, болмаса өз тілін білмейтінін ар-ұят санаудың орнына, керісінше соны өзінің бір «жетістігі», өзінің «білімдарлығы» санайтындардың жыртылып айырылатынына мән бермейтініміз қалай? Әрине, олардың айтар жауабы әзір. «Мен қай тілде сөйлегім келеді, ол өз еркім» дейді. Оңай жауап, заң бойынша орынды да жауап. Және де «қазақ тілінде неге сөйлемейсің?» деп мемлекеттік тілдің «құнын» сұрағандарды «менің құқыма қол сұқты» деген айыппен сотқа жетелеудің төте жолы да осы!

Тіл білместік қазақы ойлауды шектеді, қазақы сананы улады.

Тіл білместік ұлттық болмыстан айырып келеді.

Тіл білместік «малын жанының, жанын арының садағасы» санаған арлы ұлтты арсыздықтың апанына жығып жатқандай.

Тіл білместік Ұлы даланы мекендеген ұлы халықтың ғасырлар бойы қалыптастырған адами әдебі мен кісілік қасиетін ескіліктің қалдығы деген ұғыммен күресінге шығарып тастады.

Тіл білместік қазақтың ескілігінде де естілік бар екеніне ой жүгірту, соны ойлау қабілетінен де айырып барады.

Тіл білместік өз тілі жойылған халықтың өзінің де жойылатынының қаупін сездірсе де, соған еріксіз көніп отырғандай немқұрайлылық пен бойкүйездікке ұшыратып жатқандай.

Тіл білместік өз халқымыздың әдеби-мәдени бай мұрасын оқи алмайтын,оның құндылығын сезіне алмайтын қасіретке ұрындырды.

Тіл білместік қазіргілер үшін қазақтан басқа халықтың айтқаны жөн, істегені дұрыс көрініп тұратындай, ойланбастан соған еліктей жөнелетін дүбәрәлікке жетелеп алып барады.

Тіл білместік қазір қазақша сөйлесең жүре тыңдайтын, орысша сөйлесең тұра қалып тыңдайтын орта қалыптастырып келеді.

Тіл білместік көше-көшелердегі ілулі тұрған қазақ тіліндегі түсініксіз әрі сауатсыз жазылған түрлі жарнамалар мен түрлі бильборттарға да бойымызды үйретіп, енді соған да селт етпейтін жауапсыздыққа алып барады.

Тіл білместік қазақша не нәрсені болса да қате жаза беруге болады екен ғой, бұл тілдің сұраушысы жоқ жетім тіл екен деген қауіпті бір көзқарас қалыптастырып отыр.

Тіл білместік өсіп келе жатқан ендігі ұрпағымыздың санасына қазақ тілінсіз де күн көріп, адам болуға болады, ендігі заманда қазақ тілінің қажеті де жоқ екен ғой деген ең бір қасіретті ұғымды сіңіріп жатқандай.

***

Біздің қауіпті қорқынышымыз да осы, міне! Өйткені, бесіктен белі шықпай жатып-ақ баланың өзі қазір қазақ тілінде оқып, қазақ тілінде білім алудың қажет еместігін де біліп алғандай. Өйткені, айналамыздағы күнбе-күнгі тіршілігімізде қазақ тілі керек болмай бара жатқан сыңайлы. Соны сезімтал бала санасы да сезіп отырғандай.

Тіл білместік және енді не істеу керек деген көкейімізге жиналған өз сауалымызға орай осы бір үш бағыттағы Бағдарлама құруды ұсынар едік.

1. Мемлекеттік тіл және отбасының жауапкершілігі

Бұл бағдарлама арқылы ең әуелі мемлекеттік тіл алдындағы әр отбасының жауапкершілігін қалыптастыру, әр отбасының сол жауапкершілікті сезіне алатындай сана қалыптастыру керек болады. Әр отбасында әр ата-ана өз балаларымен тек өз ана тілдерінде ғана сөйлесу әдетін қалыптастыру аса маңызды. Мемлекеттік тіл үшін әр ата-ана, әр бала өздері жауапты екендіктерін сезіне алу қасиетін дамыту. Барлық ақпарат және электронды құралдар мен барлық әлеуметтік желілер арқылы мемлекеттік тіл алдындағы отбасының жауапкершілігін санаға сіңіретіндей әсерлі жарнамалық роликтер мен насихаттық сипаттағы мәнді сөз беріліп тұруы керек. Қазақ тілінде әуелі анасы сөйлемей баласы сөйлемейтіндігін ұғындыра білейік!

2. Мемлекеттік тіл және Мемлекеттік қызметкердің жауапкершілігі

Бұл мәселені мемлекеттік мекемелер қолға алғаны жөн. Әрине бұл арада мемлекеттің қызметке бардың екен, енді тек қана мемлекеттік тілде сөйлеу керек деген қағиданы алға тартпаймыз. Бұл арада өз ұлтымызға талап қою керек. Жарайды жиын-жиылыстарда ресми тілде сөйлесін-ақ, бірақ екі қазақ былай шыға бере бір-бірімен қазақ тілінде сөйлеп бара жатса ғой деп ойлайтын болдық. Осы арада Елбасының «қазақ қазақпен қазақша сөйлесін» деген қағидасын алға тартар едік.

3. Мемлекеттік тіл және бизнес пен халыққа қызмет көрсету саласының жауапкершілігі

Қазір кез келген сауда, демалыс орындарында бара қалсаңыз өзіңнің алдыңнан шығатын қызмет көрсетуші қазақтың жап жас ұлдары мен қыздары орысшалап қарсы алады. Міне, солардың санасына Қазақстанның азаматтары ретінде олар ең әуелі алдарына қай ұлттың, қай мемлекеттің адамы, былайша айтқанда кім келсе ол келсін, бір ауыз «сәлеметсіз бе?» деп қарсы алатын болсын, осындай талап қою керек. Содан кейін алдыңда тұрған адамның тілінде, қай тілде жауап берсе де өз еркі. Балалардың ойын-сауық орталықтарының барлығында да қазақ баласына қазақ тілі арқылы қызмет көрсету тәртібін орнықтыру керек. Бала өз ана тілінің де керек әрі қажет екенін сол ойын алаңдарында көрсетіліп жатқан қызметтен-ақ сезініп өссін.

***

Міне, біздің ой осы! Кей-кейде «осы тіл жайлы айтқанды қойсақ та болар ма екен?» деген көңіл-күйдің ырқында отыратыным да бар. Айттық қой талай сөзді. Тыңдар құлақ болды ма, әлде қалды ма? Алайда, өзге тілде сайрап тұрып, өз анасының тілін өзі қылғындырып өлтіріп жатқандарды көріп, жаным түршігеді. Еріксіз қолға қалам алдым...

Abai.kz

Тегтер: Емле ережесі, латын графикасы, жазу сауаттылығы,қазақ тілі, ана тілі
Авторы: Жабал Ерғалиев, жазушы, Қазақстанның еңбек сіңірген қайраткері

Сондай-ақ, оқи отырыңыз

48

ақпарат

Ілеспе аударма жүргізуді үйрету кластары өтті

91

ақпарат

СЛАВЯН ЖАЗУЫ МЕН МӘДЕНИЕТІ КҮНІ

154

ақпарат

Емле ережелерін түсіндіру маңызды