​«Текті сөздің төресі - терме» облыстық байқауы өтті

Аталған байқаудың негізгі мақсаты - халқымыздың ғасырлар бойы қалыптасып, дамып, ұлы дала тарихынан сыр шертетін жыр-термелердің тағылымдық маңызын насихаттау. Байқауда облыстың аудандары мен қалаларынан 15 жыршы-термеші өз бақтарын сынап, өнерлерін ортаға салды. Термешілерге ереже бойынша, "Ел бірлігі", "Астанаға 20 жыл", "Қазақстан халқын топтастырудағы тілдің маңызды рөлі" деген тақырыптар ұсынылды.

Термешілердің өнеріне есімі елге белгілі азаматтар, Қазақстан Жазушылар Одағының Қостанай облыстық филиалының директоры, ақын, байқаудың төрағасы Ғұмар Ахметчин, ҚР Еңбек сіңірген мәдениет қайраткері, «Ақжелен» ансамбльінің жетекшісі Назымбек Молдахметов, Е.Өмірзақов атындағы Қостанай облыстық филармониясының әнші-термешісі, халықаралық байқаулардың лауреаты Манапбек Кәдіров, Республикалық "Қазақстан-Заман", облыстық "Қостанай таңы" газеттерінің тілшісі, облыстық, республикалық, халықаралық жыршы-термешілердің жүлдегері, ақын, термеші Қыдырбек Қиысқан, Қостанай облысы әкімдігінің мәдениет басқармасының бас маманы Роза Олжабаевалар баға беріп қазылық етті .

Сонымен қатар, рухани санамызды жаңғыртатын, ұлттық өнерімізді ардақтайтын ісшараға бір қатар облысымызға ғана емес, республикамызға танымал өнерпаздар, Укин Кенжебек Үкіұлы, Ғұмар Ғарифұлы Ахметчин, Ақылбек Қожаұлы Шаяхметов, Нағашыбай Мұқатов, Аманжол Күзембайұлы, Жақып Қалқаман Қасенұлы қатысты.

Байқау қорытындысы бойынша, Жүлделі ІІІ орынға Амангелді ауданынан келген Фариза Жоламанова, ІІІ орынға Рудный қаласынан келген Айжан Шахаева ие болып, дипломдармен және қаржылай 50 мың теңгемен марапатталды. Жүлделі ІІ орынға Қостанай ауданынан келген Махат Жасұлан дипломмен және қаржылай 75 мың теңгемен марапатталды. Жүлделі І орынды Меңдіқара ауданынан келген Қанат Ражанов дипломмен және қаржылай 100 мың теңгемен марапатталды. Ал Қамысты ауданынан келген Әсем Қажиева "Өнегелі термеші", Жангелдин ауданынан келген Байдос Қожасағиев "Тағылымды терме", Алтынсарин ауданынан келген Серік Алпысов "Көрермен көзайымы" номинацияларын иемденді. Байқауға қатысқан 15 үміткерге «Текті сөздің төресі - терме» атты облыстық байқауына қатысқандарын растайтын сертификат табысталды.

Айта кетейік, облыстық байқау жеңімпазы 2018 жылдың қыркүйек айында Астана қаласында өтетін «Текті сөздің төресі - терме» атты республикалық байқауға қатысатын болады.